Wata guda bayan fara gasar cin kofin kwallon kafa ta kasashen Turai da Jamus ta karbi bakunci, birnin Berlin ya dauki nauyin wasan karshe na Euro 2024. Bayan da ta lallasa Ingila da ci biyu da daya, Spaniya ta lashe gasar karo na hudu a tarihinta. Wannan kofin ya bai wa Spaniya damar yi wa takwarorinta na nahiyar Turai zarra a yawan lashe kofin na Euro, inda ta zarta Jamus da kofi gudaa. Ko da yake damarmaki da Spaniya da Ingila suka samu kafin a tafi hutun rabin lokaci ba su taka kara ya karya ba, amma lamura sun sauya bayan da suka dawo filin daga. A mintuna na 47 da fara wasa yaro dan baiwa Lamine Yamal na kungiyar La Roja ta Spaniya ya mika wa amininsa Nico Williams kwallo, shi kuwa bai yi wata-wata ba wajen zura ta a raga. A daya bangare kuwa, Cole Palmer na Ingila ne ya rama wa kura aniyarta a mintuna uku bayan shiga filin, inda Jude Bellingham ya mika masa kwallo a minti na 73 da fara wasa. Sai dai yayin da ake shirin busa uir na karshe ne, Spaniya ta sake samun tagomashi a minti na 86 ta hannun Mikel Oyarzabal lamarin da ya sa ta yi wa kungiyar Three Lions sakiyar da babu ruwa.
Sababbin 'yan wasa a Jamus, yayin da aka fara shirin Euro 2024
Bayan da ta gaza kai bantenta a gasar cin kofin kwallon kafa na duniya a jere, Hansi Flick ya sako sababbin 'yan wasa matasa a kungiyar kwallon kafa ta Jamus. DW ta yi nazari kan sababbin fuska cikin 'yan wasan na Jamus.
Hoto: Bahho Kara/Eibner-Pressefoto/picture allianceMarius Wolf
Duk da shekarunsa 27, kwarewar dan wasan tsakiyar Wolf kana guda cikin 'yan wasan Borussia Dortmund da ke taimaka mata a kokarin lashe kofin Bundesligar bana ta sa ya cancanci a nemo shi. Yana wasa a tsakiya daga baya ko hagu da dama, Flick ka iya saka Wolf a magance matsalar bangaren dama. Saboda lashe gasar 'yan kasa da shekaru 20 a 2015, lashe gasar ga Jamus zai kasance babban abu ga Wolf.
Hoto: Markus FIscher/Passion2Press/IMAGOKevin Schade
Kwararre wajen kai hari, Schade ya koma taka leda a gasar Premier League ta Ingila a kungiyar Brentford daga SC Freiburg a matsayin bashi a watan Janairu da bukatar sayen sa a kan kudi Euro miliyan 25. Mai shekaru 21 a duniyar yana iya wasa a kowanne bangare, yanayin gudunsa na sanya tsoro ga abokan hamayya. Ya ci kwallaye hudu a wasa biyar a gasar 'yan kasa da shekaru 21 ta Jamus.
Hoto: Revierfoto/dpa/picture allianceFelix Nmecha
Tauraruwar dan wasan tsakiyar na Wolfsburg ta dada haskawa, bayan da aka sanya shi cikin 'yan wasan kasar Jamus. Mai shekaru 22, Nmecha ya samu damarsa a awannan kaka bayan da ya bugawa kungiyarsa ta Wolfsburg wasanni 20 cikin 24 a Bundesliga. Ta yiwu zai iya yin abin da dan uwansa maciyin raga Lukas ya gaza: zama dan wasan kasa da kkasa na Jamus.
Hoto: Jürgen Fromme/firo Sportphoto/picture allianceMergim Berisha
Berisha ya yi suna da cin kwallaye biyu ga kungiyarsa ta Augsburg a fafatawarsu da Bayern duk da sun sha kashi da ci biyar da uku. Tun da aka aro shi daga kungiyar Fenerbahce a watan Agusta, Berisha ya zura kwallaye takwas a raga ya taimaka an ci hudu a wasanni 18. Mai shekaru 24, dan wasan gaba na tsakiya kwallo daya kacal ya ci a wasanni 13 da ya yi a gasar 'yan kasa da shekaru 21 ta Jamus.
Hoto: Frank Hoermann/SVEN SIMON/picture allianceJosha Vagnoman
Kamar Wolf dan wasan baya Vagnoman ka iya samun kira daga kungiyar kwallon kafar Jamus. Dan wasan da ya yi makarantar kwallo ta Hamburg na da shekaru 22, tsawon lokaci yana fafutukar dawo da kungiyar Hamburg rukuni na farko na Bundesliga kafin ya koma Stuttgart. Ya yi wasa sau 12 ga kungiyar 'yan kasa da shekaru 21 ta Jamus, ciki har da lashe gasar 'yan kasa da shekaru 21 ta Euro a 2021.
Hoto: Bahho Kara/Eibner-Pressefoto/picture allianceWannan dai shi ne karo na biyu a jere a gasar zakarun Turai da Three Lions ta Ingila ta kasa kai labari, lamarin da ke ci gaba da sanya ta sahun kasashen da ba su taba lashe gasar ba duk da fice da babban lig din kasar wato Premier League ya yi a duniya. Duk da nuna rashin jin dadinsu game da baras da wannan damar da suk yi, amma 'yan wasan Ingila musmaman ma Jude Bellingham bai cire tsammanin lashe kofin kwallon kafa na Turai a karo na gaba ba. Da yawa daga cikin ma'abota kwallon kafa na kasashen da Ingila ta raina a nahiyar Afirka kamar Njeriya sun mara mata baya, domin ta shiga sahun wadanda suka taba lashe gasar Euro. Sai dai hakarsu ba ta cimma ruwa ba, lamarin da ya sa suka nuna rashin jin dadinsu game da yadda Spaniya ta nuna musu cewar baya ga salon wasa ko a girgije kurna ta fi magarya.
Su ma 'yan yankin kudanci da arewacin Amurka, sun buga wasansu na karshe a birnin Miami tsakanin Ajantina da Kolombiya da nufin lashe Copa America. An dai samu 'yar hatsaniya sakamakon shiga filin wasa ta hanyar da ba ta dace ba da wasu 'yan kallo suka yi, amma dai kamar yadda aka yi hasashe tun da farko Ajantina ce ta samu nasara da ci daya mai ban haushi bayan karin lokaci, sakamakon kwallo da Lautaro Martinez ya ci a minti na 112 da fara wasan. Wannan shi ne kofi na biyu a jere da kungiyar Albiceleste ta Ajantina ta lashe, bayan lashe kofin duniya na kwallon kafa da ya gudana a Qatar. A jimilce Ajantina ta yi nasarar lashe Copa America sau 16 a tarihinta, lamarin da ya bata damar zarce w Brazil da kofi daya. A yayin da Kolombiya ke a matsayi na biyu, ita kuwa Uruguay ta zo ta uku a gasar kwallon kafa ta Copa America bayan da ta samu nasara a kan Kanada a bugun daga kai sai mai tsaron gida.
Yanzu kuma sai fagen wasan tennis, inda aka gudanar da wasannin karshe na gasar Wimbledon a karshen mako. A bangaren maza, dan wasan Spaniya Carlos Alcaraz ya yi nasarar kare kambun da yake rike da shi, bayan da ya samu nasara a kan Novak Djokovic da ci shida da biyu da shida da biyu da kuma bakwai da shida. Wannan lashe gasar Grand Slam na hudu da ya yi, ya sa Alcaraz mai shekara 21 kacal fara hasashen yadda makomarsa za ta kasance a nan gaba cikin mayan 'yan wasan na tennis. Wadannan manyan da Carlos Alcaraz yake magana a kansu dai, sun hadar da Roger Federer wanda ke da kambun Grand Slam 20 da Rafael Nadal mai kambu 22 da kuma Novak Djokovic mai Grand Slam 24. A bangare mata na gasar ta Wimbledon kuwa da ci shida da biyu da biyu da shida da kuma shida da hudu ne, 'yar Jamhuriyar Cek Barbora Krejcikova ta lashe wasan na karshe a gaban Jasmine Paolini na Italiya wacce dama ta riga baras da wasan karshe a Roland-Garros a wannan shekara. Wannan shi ne kofin Grand Slam na biyu da Krejcikova ta samu, baya ga na Roland-Garros a 2021.
