Yakin Ukraine na gallaza wa kasashen duniya matalauta

Majalisar Dinkin Duniya ta yi kira ga kasashen duniya da su yi amfani da matsalar da yakin Rasha da Ukraine ya jefa su wajen karkata ga makamashin da ake sabuntawa.

Sakatare janar na Majalisar Dinkin Duniya Antonio Guterres ya ce yakin da Rasha ke yi da Ukraine na kuntata wa kasashe duniya matalauta ta fannonin rayuwa da dama.

A ganawar da ya yi da manema labaru, Antonio Guterres ya ce kasashen da a baya ke fama da kansu yanzu sun kara shiga cikin hali na matsi, a sabili da hauhawar da farashin kayayyakin masaraufi da ma na makamashi suka yi, wanda a cewar shi ire-iren wadannan kasashen basu murmure daga halin da cutar Covid-19 ta jefa su a baya ba.

Guterres dai na ganin kasashen duniya ya kamata su yi amfani da wannan matsalar wajen maida ta dama ta karkata ga makamashin da ake sabuntawa.