A wannan Jumma'a ake fara taron tsaro na shekara-shekara karo na 61 a birnin Munich na Jamus. Taron na wannan karon na zuwa lokacin da Amurka ta bayyana shirin kawo karshen yakin da ke faruwa tsakanin Rasha da Ukraine.
Karin Bayani: Zelensky ya gabatar da manufofinsa na samun nasara kan Rasha
Shugaban kasar Jamus Frank-Walter Steinmeier zai bude taron tsaron na kwanaki uku, inda ake sa ran shugabannin kasashe 60 da fiye da ministoci 100 gami da masu ruwa da tsaki kan batutuwan tsaro za su halarci zaman muhawarar, ciki har da Shugaba Volodymyr Zelenskyy na Ukraine da shugaban gwamnatin Jamus Olaf Scholz, gami da wakilan Amurka karkashin mataimakin shugaban kasar JD Vance, shi ma sakataren harkokin wajen Amurka Marco Rubio yana cikin mahalarta taron.
Yanzu haka Shugaba Donald Trump ya kara matsin lamba kan tattaunawa game da kawo karshen yakin da ke faruwa bayan kutsen Rasha a kasar Ukraine, inda yake gani lokaci ya yi na tattaunawa da Shugaba Vladimir Putin na Rasha.