Mai rikon mukamin Magajin Garin birnin Toronto Olivia Chow ta ce ta yi matukar kaduwa da jin labarin afkuwar lamarin, duk da cewa ta samu nutsuwa bayan jin cewa ba a samu asarar rayuka ko da guda daya ba daga cikin fasinjoji da ma'aikatan jirgin su kimanin 80, kamar yadda ta wallafa a shafinta na X.
Karin bayani: Jirgin fasinja ya yi karo da na soji a Amurka
Hadarin jirgin na Toronto na zuwa a 'yan kwanaki da samun hadararrukan jiragen sama a arewacin Amurka da suka hada da taho mu gaba da wani jirgin helikwafta na soji ya yi da wani jirgin fasinja a birnin Washington wanda ya halaka mutane 67, da kuma wani hadarin jirgin daukar marasa lafiya da ya yi sanadiyyar mutuwar mutane bakwai a Philadelphia, sai kuma wani hadarin jirgin da ya halaka mutane 10 a Alaska.