Ma'aikatan filin jirgin sama a Kenya sun janye yajin aiki

Ma'aikatan filin jirgin sama a Kenya sun amince su koma bakin aiki bayan shafe kwana guda suna yajin aiki. Babbar kungiyar kodago ta kasar ta tabbatar da janye yajin aikin.

Sakataren hadaddiyar kungiyar kungiyar yan kwadagon Francis Atwoli ya ce gwamnati ta amince cewa shirin jinginar da filin jirgin saman ga kamfanin Adani na Indiya zai gudana ne kawai idan 'yan kungiyar kwadagon sun amince

An tabbatar wa ma'aikatan cewa babu wanda za a hukunta ko ya rasa aikinsa saboda ya shiga yajin aiki.

Ministan sufuri na kasar Kenyan Davis Chirchir ya shaida wa yan jarida cewa gwamnati za ta kare muradun yan Kenya a kokarinta na inganta filin jirgin saman zuwa na zamani.