Koriya ta Arewa ta soki Guterres kan nukiliyarta

Koriya ta Arewa ta caccaki Sakatare-Janar na Majalisar Dinkin Duniya Antonio Guterres, kan kalaman da ta kira 'masu hatsarin gaske' na neman kawar da makaman kare dangi na Pyongyang.

Guterres, wanda ya kai ziyarar kwanaki biyu a Koriya ta Kudu, ya bayyana cewa babban aikin da ke gabansa shi ne kawar da makaman nukiliyar Koriya ta Arewa don samar da zaman lafiya, tsaro da kwanciyar hankali a yankin baki daya.

Sai dai ma'aikatar harkokin wajen Koriya ta Arewa, ta zargi MDD da yunkurin kare muradun Amirka. Koriya ta Arewa ta yi gwajin makaman da ba a taba gani ba a bana, wanda ya hada da harba makami mai linzami da ke tsakanin nahiyoyi a karon farko tun shekarar 2017.