Koriya ta Arewa: Sabon gwajin makami

Kamfanin dillancin labarai na Koriya ta Kudu Yonhap, ya ruwaito cewa Koriya ta Arewa ta yi gwajin makamai masu linzami guda uku a kusa da Pyongyang babban birnin kasarta.

Tuni dai mahukuntan Seoul suka nuna damuwarsu, inda majalisar tsaron kasar ta yi wani taro domin tattauna lamarin. A nasa bangaren ministan tsaron kasar Japan, Nobuo Kishi ya bayyana gwajin makamai masu linzamin na Koriya ta Arewa da neman tayar da zaune tsaye, wanda kuma ya ce ba za a lamunta ba. Koriya ta Arewa dai na fama da tarin takunkumai sanadiyyar shirinta na makaman nukiliya, sai dai a mahukuntan Pyongyang din na nuna halin ko in kula dangane da takunkuman.