Kafewar koguna a Turai ya haifar da matsalar zirga-zirga jiragen ruwa

A Jamus sakamakon rashin ruwan sama da fari da kasar da ma yammacin Turai ke fama da shi, kogin Rhine na ci gaba da kafewa, lamarin da ya haifar da datserwar zirga-zirgan jiragen ruwa da ke dakon kaya.

Kogin na Rhine dai na zama daya daga cikin manyan hanyoyi na safarar kayayaki daga teku zuwa wasu sassa na kasar da ma wasu kasashen duniya.

A sanarwar da ma'aikatan sufuri ruwa suka fidda a yau Litinin, akwai yiwuwar kogin ya kara janyewa kamar yadda masu hasashen yanayi suka nuna. Kuma farashin jigilar kayayyaki ta wannan hanya na iya karuwa.

A shekarar 2018 an sami makamancin wannan matsalar ta kafewar kogin na Rhine wanda ya jagoranci karancin kayayakin da kamfanoni da dama suke bukata.