EU: Mamayen Rasha a Ukraine ya haifar da tsadar kayayyaki

Hukumar tarayyar Turai ta yi hasashen tashin gwauron zabi na farashin kayayyaki a nahiyar Turai sakamakon mamayar da Rasha ta yi wa kasar Ukraine wanda ya janyo tsadar abinci da makamashi.

Hukumar tarayyar Turai ta ce tana hasashen mamayar da Rasha ta yiwa Ukraine zai kara tashin farashin kayayyaki zuwa kashi 7.6 cikin dari wanda aka dade ba a gani ba. Bugu da kari hukumar ta kuma yi hasashen za a sami tsaiko a cigaban tattalin arziki a 2022 da kuma 2023.
 
Tsadar kayayyaki a kasashe masu amfani da kudin euro ya yi matukar tashi saboda yakin Ukraine kamar yadda hukumar tarayyar Turan ta wallafa.

Mataimakin shugaban hukumar Turan Valdis Dombrovskis ya ce yakin Rasha a kan Ukraine na cigaba da dakushe hasken tattalin arziki a nahiyar Turai.

Yakin dai ya haifar da tashin gwauron zabi na farashin abinci da makamashi a Turai yayin da kasashe ke fafutukar lalubo hanyoyin da za su kauce wa takunkumin da aka sanya wa wasu muhimman kayayyaki.