China ta yi nisa wurin kera makamin nukiliya

Mahukunta a Chinan sun ce za su yi amfani makamin nukiliyar ne kawai a wurin kare kansu, kuma ba za su taba fara amfani da makamin ba, sai idan wani ya fara kawo musu hari da shi.

China ta yi nisa wurin kera makaman nukiliya. Ministan tsaron kasar Wei Fenghe ne ya sanar da haka a wannan Lahadi a yayin taron koli kan harkokin tsaron yankin Asiya da ke gudana a Singapore. Ministan ya ce shekaru sama da 50 suka kwashe suna kokarin kera makamin.

Tun a shekarar da ta gabata Amirka ta ce ta bankado yadda China ke bunkasa makamashin nukiliya ba tare da sanin duniya ba. To sai dai ministan tsaron Chinan ya ce burin kasarsa shi ne kokari na dakatar da amfani da makamin kare dangi a duniya ta hanyar kare martabarta.