An gano jirgin da ya yi hatsari a Nepal

Rundunar sojin kasar Nepal ta sanar a wannan Litinin cewa ta gano burbushin karamin jirgin saman fasinja da ya bace dauke da mutum 22 bayan an kwashe sa'o'i ba a san inda jirgin da ya yi hatsari ya fada ba.

Rahotannin da ke shigo mana na cewa kawo yanzu an gano gawawwaki 21 cikin mutanen da hatsarin ya ritsa da su. 
A safiyar ranar Lahadi ce dai jirgin dauke da galibin masu yawon bude ido ya rasa hanyoyin sadarwa da ma'aikatan da ke ba shi umurni, 'yan mintoci bayan ya tashi daga filin jirgin sama a Nepal. Cikin mutanen da hatsarin jirgin ya ritsa da su akwai Jamusawa da 'yan Indiya da kuma 'yan kasar ta Nepal.