Darurruwa mutane sun ziyarci kabarin marigayi Alexei Navalny a birnin Moscow a wannan Lahadi albarkacin zagoyowar cika shekara guda da mutuwar babban dan adawar na Shugaba Putin.
Duk da barazanar da suke fuskanta daga fadar mulki ta Kremlin da kuma tsananin sanin da ake yi, magoyan bayan Navalny wanda ya mutu a gidan yari sun fita kwansu da kwalkwatarsa domin ajiye furni a gaban kabarin marigayin a matsayin girmamawa.
A gefe kuma mai dakinsa Madam Yulia Navalnaya da ke halatar wani taron gangami da aka shirya a birnin Berlin fadar gwamnatin Jamus ta bukaci magoya bayansa da su ci gaba da gwagwarmaya domin 'yantar da Rasha, kokawar da Alexei Navalny ya sadaukar da rayuwarsa domin ita.
Karin bayani: Jagoran adawar Rasha Alexei Navalny ya mutu a kurkuku
Sai dai ana gudanar da bukukuwan tunawa da Navalny a daidai lokacin da rikicin cikin gida ke ci gaba da haifar da rarrabuwar kawunan 'yan adawan Rasha a cikin wani yanayi da ba taba ganin irinsa ba.
Dama dai galibin shugabannin adawar na Rasha na gudun hijira a kasashen ketare, lamarin ya ke rage musu karfin gogawa da Vladimir Putin wanda ya yi fice wajen murkushe masu adawa da mulkinsa.