An cafke wanda ke shirin kashe George W Bush

An kama wani dan kasar Iraki da ya kitsa shirin halaka tsohon shugaban kasar Amirka George W Bush. Mutumin ya shirya daukar fansa kan mamayar da Amirka tayi a lokacin mulkin Bush.

Jami'an tsaron sun yi nasarar cafke mutumin dan kasar Iraki da ya kitsa hallaka tsohon shugaban kasar George W. Bush. Mutumin mai suna Shihab Ahmed Shihab da ya nemi mafakar siyasa a Amirka a bara, ya yi yunkurin shigo da wasu 'yan Iraki hudu cikin Amirka ta barauniyar hanya domin taimaka masa aiwatar da shirin kamar yadda binciken Hukumar FBI a kasar ya nunar.

Dan shekaru hamsin da biyu da haihuwan, ya ce, suna son su kashe Bush ne a matsayin fansa a sakamakon umarninsa na mamaye Iraki a shekara 2003 a lokacin da ya ke shugabancin Amirka, lamarin da suka ce, ya janyo asarar rayuka tare da tagayyara kasar ta Iraki.