Kusan fursunoni 900 kawo yanzu hukumomi a Najeriya suka tabbatar sun tsere daga gidan yarin Kuje da ke babban birnin kasar, Abuja bayan harin da aka kai a ranar Talata da daddare. Mai magana da yawun hukumar da ke kula da gidajen yarin kasar, Umar Abubakar, ya tabbatar da cewar wasu daga cikin fursunonin yanzu haka na hannun hukumomi. To amma ya ce kawo yanzu fursunoni 443 ne ba a ji duriyarsu ba.
Da yammacin Larabar nan, Shugaba Muhammadu Buhari, ya kai ziyara gidan kason na Kuje, inda aka nuna masa irin mummunan ta'adin da maharan suka yi kafin su saki fursunoni. Tun da farko gwamnatin Najeriyar ta zargi kungiyar Boko Haram da kai harin ta amfani da abubuwa masu fashewa domin kubutar da mambobinsu da ke wurin.
A baya dai an sha samun irin wannan a Najeriya. To amma wannan shi ne karon farko da mahara suka fasa gidan yari a babban birnin kasar, Abuja.