Da sanyin safiyar Litinin jami’an DSS suka yi awon gaba da Kwamred Ajaero a filin jirgin sama da ke Abuja.
DSS ta kama Ajaero ne a hanyarsa ta zuwa ƙasar Birtaniya, inda zai halarci Babban Taron Ƙungiyar Ƙwadago ta Duniya, wanda za a fara ranar Litinin ɗin a birnin London.
Majiyoyin tsaro a hedikwatar DSS da ke Abuja sun tabbatar wa Aminiya cewa Ajaero na hannunsu, sun titsiye shi da tambayoyi.
Wata majiya ta shaida mana cewa tsare Kwamred Ajaero na da nasaba da zargi da ake masa na dauƙar nauyin ta’addanci.
Ana iya tuna cewa a kwanakin baya, ’yan sanda sun tsare Kwamred Ajaero tare yi masa tambayoyi bayan sum zarge shi da hannu a ɗaukar nauyin ta’addanci.
A ranar 29 ga watan Agusta ’yan sanda suka yi masa tambayoyi a Abuja, daga bisani suka sallame shi.
DSS ta kai samame ofishin SERAP
Jami’an hukumar tsaro ta DSS sun kai samame ofishin kungiyar SERAP da ke Abuja.
Hukumar ta kai samamen ne sa’o’i bayan da jamianta suka kame Shugaban Ƙungiyar Ƙwadago ta (NLC), Joe Ajaero.
A safiyar Litinin jami’an DSS suka kama Ajaero a filin jirgin sama da ke Abuja, a hanyarsa ta zuwa ƙasar Birtaniya taron Kungiyar Kwadago ta Duniya.
Bayan nan ne SERAP ta sanar cewa jami’an hukumar ta kai samame ofishinta.
Duk da cewa babu cikakken bayanin wainar da ake toyawa, SERAP, ta wallafa a shafinta na X cewa: “Jami’an DSS sun zo sun mamaye ofishinmu da ke Abuja ba bisa ka’ida ba, da cewa suna neman daraktanmu.
“Muna kiran Shugaba Tinubu ya umarci DSS nan take su daina razana jama’a da barazana ga ’yancin al’umma.”
A ranar Lahadi kungiyar SERAP ta ba wa Shugaba Tinubu wa’adin awa 48 ya janye karin kuɗin man fetur.
“Muna kira ga Shugaba Tinubu ya yi amfani da matsayinsa ya umarci NNPCL ya janye haramtaccen karin kudin fetur a gidajen manta,” in ji wasikar da Daraktan SERAP, Kolawole Oluwadare, ya sanya mata hannu.
LabaranSamun Labaran RFI, Hirarraki, Rubattattuun Labarai, Labarai game da wani, shirye-shirye.
Hulda da muKu saurari dukannin labaran duniya ta hanyar sauke man hajar RFI
