Turkiyya ta mika ta'aziyya da kuma jajantawa Amurka kan wadanda suka rasa rayukansu sakamakon rushewar wani gini a jihar Florida.
A cikin wata rubutacciyar sanarwa da Ma'aikatar Harkokin Wajen Turkiyya ta fitar, an bayyana bakin cikin samu labarin cewa akwai wadanda suka mutu da wadanda suka jikkata a ibtila'in, kuma mutane da yawa sun kasance a karkashin baraguzan ginin sakamakon rushewar wani bene mai hawa 12 a ranar 24 ga watan Yuni a Miami Dade, Florida.
A cikin sanarwar an kara da cewa,
"Muna nuna alhininmu ga mutane da gwamnatin Amurka da fatan samun sauki cikin gaggawa ga wadanda suka ji rauni."
An sanar da cewa mutane 4 sun rasa rayukansu sakamakon rushewar wani bangare na bene mai hawa 12 a ranar 24 ga watan Yuni a Miami Dade, Florida, Amurka, kuma ba a ji duriyar mutane 159 da ake tunanin suna karkashin baraguzan ginin.
