Jirgi mai saukar unglulu ya fado a Rasha

Jirgin sama mai saukar ungulu samfuri MI-8 na soji mallakar Rasha ya fado a lokacinda yake kokarin sauka ta karfi inda mutane 4 da ke cikinsa suka mutu.

Sanarwar da Ma'aikatar Tsaro ta Rasha ta fitar ta ce jirgin samfurin "MI-8" ya yi sauka ta karfi a kusa da filin tashi da saukar jiragen sama na Ugolniye Kopi da ke yankin Chukotka a lokacinda yake bayar da horo.

Kamfanin dillancin labarai na TASS da ke Rasha ya bayyana cewar mutane 4 da ke cikin jirgin da ya kama da wuta bayan fadowa sun mutu baki daya.

Ana tunanin hatsarin ya afku sakamakon matsala da injin jirgin ya samu.

A makon da ya gabata ma a Moscow Babban Birnin Rasha jirgin sama na soji samfurin MI-8 ya fado inda mutane 3 suka mutu.