Isra'ila ta kai hare-haren bam Zirin Gaza

Jiragen yaki na Isra'ila sun yi ruwan bama-bamai a yankunan Zirin Gaza daban-daban.

Sanarwar da Rundunar Sojin Isra'ila ta fitar ta shafin Twitter ta ce an kai hare-haren kan matsugunai da hanyoyin karkashin kasa na Hamas.

Sanarwar ta ce an kai harin donmayar da martani ga harin harshen wuta da aka harba Isra'ila daga Zirin Gaza.

Ba a bayyana ko an samu asarar rai ko dukiya ba sakamakon hare-haren.