‘Rasha na dakon mayaka da makamai daga Siriya zuwa Libiya’

Dakarun kasar Libiya sun bayyana cewa jiragen saman Rasha dauke da mayakan Siriya da kuma makamai sun yi sauka har sau 11 a filin tashi da saukar jiragen saman al-Ghardabiya dake Sirte.

Kanfanin dillancin labaran Anadolu ya rawaito dakarun Libiya sun tabbatar da cewa jiragen Rasha sun dauko mayaka daga Siriya da kuma wasu na’urorin kariyar sararain samaniya kirar Pantsir da makamai da sauransu.

A ranar 6 ga watan Yuni, halatacciyar gwamnatin Libiya ta kaddamar da farmaki mai karfin da ya dorata akan tubalin nasara a inda ta karbe ikon yankunan gabashi da tsakiyar Libiya da suka hada da Sirte, Jufra, da garuruwa a yankin Wadi Wishka, Buerat, Jarif da Qasr Abu Haid daga hannun ‘yan tawaye.