Bayanai sun ce tun bayan faɗuwar gwamnatin Bashar al-Assad a Syria, Rasha ta fara laluben yankin da za ta jibge dakarunta waɗanda a baya ke a sansanin Moscow na Damascus, waɗanda kuma su ne ke kula harkokin ƙasar a Afrika dama gabas ta tsakiya.
A cewar wasu majiyoyi motocin yaƙi fiye da 100 ne suka isa Bamako a ranar 17 ga watan da muke na Janairu ciki har da tankokin yaƙi ƙirar T-72B3M da BMP-3 baya ga motocin yaƙi ƙirar BTR-82A 8×8 da kuma Spartak da Linza kana Tiger 4×4 masu silke.
Kafin yanzu akwai bayanan da ke nuna cewa, Rasha ta kwashe wani ɓangare na sansanin Sojinta zuwa Libya, tun bayan faduwar gwamnatin ta Assad a watan Disamban bara.
Alamu na nuna cewa Rasha na son ƙarfafa dakarunta na Sojin hayar Wagner waɗanda ke aiki da gwamnatocin ƙasashe da dama a nahiyar ta Afrika ciki har da Mali wadda ko a watannin baya-bayan nan aka ga yadda ƴan ta’addan ƙungiyar JNIM mai biyaya ga alqaeda ta hallaka da dama daga cikinsu.
Wannan bayanai dai na zuwa ne a dai dai lokacin da shugaban na Mali Kanal Assimi Goita ke sanar da shirin ƙasar na samar da kamfanonin ƙera makamai mallakinta a cikin gida don kaucewa fita ƙasashe neman makaman.
Mali na sahun ƙasashen Sahel da ke ci gaba da fuskantar hare-haren ƙungiyoyin ƴan ta'adda da ke iƙirarin jihadi wanda ke barazana ga tsaro da zaman lafiyar al'ummarta.
LabaranSamun Labaran RFI, Hirarraki, Rubattattuun Labarai, Labarai game da wani, shirye-shirye.
Hulda da muKu saurari dukannin labaran duniya ta hanyar sauke man hajar RFI
