An yi garkuwa da dalibai da dama a Najeriya

A jihar Kaduna da ke arewacin Najeriya 'yan bindiga sun kai hari wata makarantar sakandire tare da garkuwa da gwamman dalibai.

Kwamishinan 'Yan sandan Jihar Kaduna Muhammad Jalije ya shaida cewa, da safiyar Litinin din nan ne 'yan bindigar dauke da makamai suka kai hari kan makarantar sakandire ta Bethel Baptist da ke garin Damishi tare da bude wuta kan mai uwa da wabi.

Jalije ya shaida cewa, an yi garkuwa da gwamman dalibai a yayin kai harin, an kuma kubutar da 17 daga cikin daliban.

Kwamishinan ya kuma ce, ba a san takamaiman adadin daliban da aka yi garkuwar da su ba, kuma daga baya za a yiwa jama'a cikakken bayani.