Ambaliyar ruwa ta yi ajalin mutane 15 a Najeriya

Mutane 15 sun rasa rayukansu sakamakon ambaliyar ruwan da mamakon ruwan sama ya janyo a jihar Kano da ke arewacin Najeriya.

Labaran da jaridun kasar suka fitar sun rawaito dagacin Doguwa Alhaji Yusuf Umar na bayyana an samu ambaliyar ruwa a garin sakamakon ruwan saman da aka samu kamar da bakin kwarya a ranar 23 ga Yuli.

Umar ya shaida cewa, mutane 15 ne suka rasa rayukansu inda wasu da dama suka jikkatai wasu kuma sun bata sakamakon ambaliyar ruwan.

Umar ya kara da cewa, ana ci gaba da aiyukan ceto da kubutar da jama'a daga yankin, kuma gidaje da dama sun lalace.